كرونا و القليل ...جمال جلالي

 ** #كُورُونَا_وَ_اّلـﭬَـلِيلْ **

01 – لَا تُقْنُطْ يَا صَاحْبِي لَا تْزِيدْ اّلهَمْ عْلِيهْ 

     يْفَرَجْهَــا رَبِــي وْتَرْجَــــــعْ مَبْهَاهَا 


02 – هَـذْ  بَلْـوَة جَاتْ لّلعَبْــدْ تْكَاكِيهْ

        يَا سَّامَـعْ لَبْيَـاتْ وَفْهَـــمْ مَعْنَاهَا 


03 – هَـذَا أَمْـرْ الله لَا مَــنْ دَارِي بِيهْ

        سُبْحَانْ اّلمَعْبُـودْ يَرْفَــــعْ قْضَاهَا 


04 – بَاذْنَكْ يَا مَالِيكْ اّلمُصَابْ تْشَافِيهْ

      وْتَرْحَـمْ مَنْ مَاتُـــو اّلجَنَةْ مَثْوَاهَا 


05 – هَـمْ اّلكُورُونَا وْزَادْ اّلحَجْرْ عْلِيهْ 

       وْتَلْفَتْلُــو لَبْيَـاتْ مَا عَادْشْ يَلْقَاهَا 


06 – هَـمْ اّلفَرِينَــــــةْ وَسْمِيــدْ مْعَيْيَهْ 

       كَثْـرُو خُطَافُـو اّلخَلْقَـــةْ مَـﭬواها 


07 – وْهَـمْ اّلمَصْرُوفْ كُلَـشْ زَايَدْ فِيهْ 

       وَاّلخَدْمَـــةْ  مَـا بْقَاتْ رَاحْ وْخَلَهَا 


08 – وْزَادُلُـو تُجَـارْ اّلدَمْ يْمُـــصُ فِيهْ 

      لَا خَـوْفْ مَــنْ الله لَاخْـرَهْ وَنْسَاهَا 


09 – هَــمْ اّلدَنْيـَــا زَادْ كُوُرونَــا مَنْهِيهْ 

       حَتَّــــى بْيُـوتْ الله فَرْغَتْ سْوَاهَا 


10 – يَا حْلِيلْ اّلـﭬَلِيلْ مَارَاهْ صَارِي فِيهْ 

      حَتَّـى مَــــنْ لَحْبَــابْ بَطَـلْ يَلْقَاهَا 


11 – كَثْرَتْلُـو لَهْمُـومْ لَاحَــدْ يْوَاسِيــهْ 

      هَارَبْ لَــــكْ يَالله بِيـــدَكْ مَحْيَاهَا

 

12 – وَبْجَاهْ اّلرَسُـولْ لَمْجَـدْ وْصَحْبِيهْ 

     بُوبَكْـرْ وْعُمَـــرْ عْلَــى اّلحَوْضْ لْقَاهَا 


13 – وَبْجَاهْ اّلصُلاَحْ وَصْحَابْ اّلتَنْبِيهْ

      حُفَـــــاظْ اّلقُـــرْآنْ يَــــاسِينْ وْطَهَ


14 – سَلَكْتْ بْرَاهِيـمْ حَاجَـةْ مَا تَاذِيهْ 

         بَـــــرْدًا وَسَـــلَامْ نَــــارُو طَفَاهَا 


15 – يَا قَاهَرْ فَرْعُونْ مُوسَى وَمْنَجِيهْ 

       نَجِينَــــا بَرْضَاكْ اّلرَحْمَــةْ يَرْجَاهَا 


16 – يَا خَلَقْ اّلكَــوْنْ بْأَمْــرَكْ وَمْسَوِيهْ

      حَاجَــةْ مَا تَخْفِــاكْ عَالَـــمْ مَسْرَاهَا 


17 – ذَ اّلعَبْـدْ اّلضَعِيفْ يَتْوَسَلَكْ نَجِيهْ 

      وْمَـــنْ ﭬَالُو أَمِيـنْ فِّي اّلحَدْ سْوَاهَا

 

18 – تَرْفَعْ ذَ اّلفَيْرُوسْ عَ الّأُمَهْ يَخْطِيهْ

      وَتْبَلَغْنَـــا رَمْضَـــانْ تْرَاوِيـــحْ مْعَاهَا 


19 – وْنَخْتَــمْ بَاّلصَلَاةْ دَايَـمْ ذَكْرِي لِيهْ 

     صَاحِــبْ اّلشَفَاعَـةْ اّلرَوْضَـةْ مَحْلَاهَا 


20 – صَلُـوا يَا لَحْبَـابْ خَيْرْ صْلَاةْ عْلِيهْ 

     أَبُـــــــو فَاطِيمَـــةْ اّلكَوْثَــــــرْ مُولَاهَا 


نسر الصحراء جمال جلالي  يوم 30/03/2020

تعليقات

المشاركات الشائعة