علي جدايني ( المرزوقي )
::::::: ( يا مكنوني ) ::::::
يا مكنوني واش جابك للحضرة
عييت نداري فيك وانت تتربص
راه غريمك واعر طريڨو جمرة
تعرفها كي كان لعلام منكس
كنت عڨاب الليل ضاوي للڨمرة
اللي شافك طاب ليه النوم نعس
يعرفك غططاه من موس الغدرة
و ماتخدع ولاتخون اللي فالس
يعرفك زعيم في وقت النعرة
وقفاتك رهبة اللي طاح يخلص
يعرفك مفطوم من لبة حرة
علام الخيمة فالقلوبة يتقدس
يعرف ذاك الحر مسكون بعدرة
ما كالي مال اليتامى ما غمس
عقاب الليل سميتك عند الدشرة
شهدولك وبناولك ريبة وقفص
ماضي فات عليك مخطوط لعبرة
اليوم عقاب اتكسر جناحو وانقس
والهامة عللات فوقو بالقدرة
واللي جاب الغالية راهو يرخس
التاريخ يلا انذكر كسر حجرة
تشهد كل جبال وين العود اعفس
يذكروني ناس شرفة مالصحرا
وفي ذ البر حتى الغابة تتنافس
غير غريمي شافني ولد الضرة
وكرمني بمسايسو بيض تبڨص
واعطى خويا عين تبرق فالنظرة
خلاف العين اللي حقد فيها قنص
يا ظالم وعلاه تسقيني عصرة
تعري فيا انا اللي كنت نلبس
ماجابتني رياح مالي من برا
ما قاستني ريح ثورة م غدامس
ولد دزاير عاشق سماها حرا
وجدودي كرطوشهم كان يرڨص
ماني طامع فيك تبعثني عمرة
ولا طامع في جلالك يا سايس
اعطيني حقي بيه نزيان ونبرا
ما صحتلي لا الخضرة لا يابس
واللي دار على المرزوڨي نشرة
ماننبحشي كي كلابي فالغافس
نعرفكم م زمان بغلتكم عثرة
وحديث الوذنين فيكم يتراقص
طلقنا ثلاث هذيك العشرة
والعاهد اللي بقى فالحق حبس
#بقلم المرزوقي (علي جدايني)
تعليقات
إرسال تعليق