سماح ... جمال جلالي
___________________________________
*** سماح ***
___________________________________
سماح نقولها من قلبي سماح
01 – سماح نقولها من قلبي
** يا من سطرت خطوط دربي
** ناديتك ... وينك يا غُلبي
** لا تجافي و ارواح *** سماح
02 – يا سالب روحي ولُبي
** يا بلسم لجرحي وطبي
** ما درتك سر حتى نخبي
** نقشت حروفك وسط للواح *** سماح
03 – يا هاجر ارضي وسمايا
** ومنشف دموع البكايا
** هجرانك زايد في شقايا
** نتلاطم بين لمواج لواح ** سماح
04 – يا قادي فيا نار لشواق
** ما نحمل طول لفراق
** هامل بين لسواق
** ونادي يا مداوي لجراح ** سماح
05 – يا عيني وعلاه تبكي
** ما لقيتي لشكون تشكي
** بركاني من بكاك بركي
** ما تزيدي لقلبي لقراح ** سماح
06 – ماني طول الليل نقرد
** في دواخلي نيران تصهد
** بسلاسل حبك راني مقيد
** غابت من وجهي لفراح ** سماح
07 – غيبت ... وغيابك طال
** ستنيت وستنيت شحال
** اكتبتك ... حروف موال
** وتهت بين لبرور نواح *** سماح
08 – تمنيتك في يوم ترجع
** وهمومي من البال تُضع
** ما تخلي لعلال توجع
** نهنا من بالي ونرتاح *** سماح
09 – يا هوسي فيك نرجى
** دللتك وزدت درجة
** لا تخلي ليام عوجة
** خايف ما يطلع صباح ** سماح
10 – ترجيتك ومبان خبرك
** كاويني بغرام حبك
** لشيوخي راني شكيتك
** ونادي وينكم يا صُلااح *** سماح
11 – المبلي بيك واش يدير
** نهار تغيب راه يحير
** ما طول عليه كثير
** يصدح... ويغني بموالو بواح ** سماح
12 – مقصودي ما هو بنية
** تهواسي لي هام بيا
** ناسيني ما حاس بيا
** هايم...كي الڨُمري في لسطاح ** سماح
13 – هاجرني شيطان شعري
** ماني ظالم ياك عمري
** ما نسلم حتى لقبري
** ماني طالب غير السماح ** سماح
14 – سماح نقولها من قلبي
** يا من سطرت خطوط دربي
** يا لي زايد في عذابي
** ما طولشي و ارواح ** سماح
نسر الصحراء جمال جلالي 16/09/2021
تعليقات
إرسال تعليق