وصف الخيل ..... احلام ياسمين

         ::::وصف الخيل ::::

لدهم فالملجوم .. يتبارڨ أسـود

رافع راسو لسّـما شــاو المـشوار

كي شايش مرفود وعضادو ترعدّ

مـوّر لارض حـافرو يڨـدي فالـنًـار

في لجامو مـرڨـوم يـاكل ويكـدّد

يصهل بـتْحَـنحين مـاهوشي صبّار

و يشـالي بــرّاڨ مــتْـأهّـب لـلْبَـعدّ

يسـتنـّى في فـارسو من عقلو طار

شـاهي يعـزم بيــه من قبل الـموعد

بيـن قـرانـو فـزّ ..... خــلاّهـا قبــاّر

مَـزْيـن ذاك العَــود بالجـرية كي هـدّ

يـطوي لـَثْـنَايـا بـرَمْشَــة من لنـْظـار

يـشـبَـه للــبرّاڨ ..لالا .. تڨـول أزود

يااا سبـحان الله الــخلاّق الصــّوّار

من صيـفات الــرّيح حـطّ فيه ومـدّ

و بالــرّزق  امْبارك من كسبو فـالـدّار

في نواصيه الخير من صـانو يَـسْعدّ

و أنـا حُـبّي لـيه مـاعنـدوش عْـــبار

عـقلي طـااير بــيه نُـمـدح و انْــزوّد

نشـتي نكـسب فيه واحد من لخيار

ونحطـّو في العين كي كُحل المـرودّ

نحوّس بيه انْـجـول ، لبْـرور و لَوْعـار

و إذا  مُـتَـتّ  عـلـيه  دوّر  بــيـّا صـدّ

من طـبْـعو لــوفاء ، ماهـوشي نــكّار

ومن صيفات الخيل ما تتـذلّ لْلحــدّ

مرفــوعات الرّاس مهمـا بيهـا صــار

والجُــرح المفتوح في السّرج مـلمّـد

ما تكشف هيهاات ، نَـنْـتُڨـصف لـعْمار

تتحـمّل لــوْجـاع مـا تــشْكي تجحـدّ

صــانت كـل مـيـعاد مـا دارتش العار

 أحلام ياسمين.