نولي شاعر ... أحمد مداح
نـــولي شــاعــر
01-ڨلــت نعاند زعمـا نولي شاعر
و نصيـر كبيــر تشيــع خبــاري
02-نميـز و نحـط مـايجي فـا لخاطر
يكـون مـوزون ثماني ولا عشـاري
03-ماهو عيب نتعلم على طـاعة كـابـر
ڨندوز نتعلم فـي زاويـــة كبــاري
04-والحرفة بلا شيخ ساسها خاسر
ب حجار الحكمة يعلـى جِــداري
05-نستفسر كبيــري فـا لحكمـة نشــاور
طـــماحي نغزر و يسهل مشــواري
06يـتعدل ميزاني نــولي سلطان منابـر
مــع القوامة نڨوم يفيَٓـع غباري
07-يعــرفوني قلــم التـل واجبي نفتاخر
نكتــب صيد الخاطر وشتا صـاري
08- نفرحكي يڨـولوا لـي أنت مـاهـر
عربون المحبة لحباب هما شعاري
09-رافـڨ الرفاڨـة لمجالسهم نمشي حافر
نكتب شعـاري نخطف عقل القـاري
10-نــولي محبــوب الشـاري و التاجـر
عنــد صغيـري و كبيـري كل نضـاري
11-كلامي يطوع العاصي يتوب الكافر
إلهامي يرعـى مــن الغابة و سداري
12_لاڨي بين الملاح ما نبغيش نعاير
نغـزَل الڨلوب القاسية تحن بفكاري
13-نـزرع. الـود فا لوطــا و الحراحر
يروى ڨلب العاشـق من بيـر سراري
14-عولـ ة الشعـر. نملا بيـها المطامر
نبنــي خيمة شعـاري مــن تــدباري
15-نبغــي مـع حـروف العطـف نتسـامر
مـرات نفرح مرات تتعاسر ضراري
16-كانا و خاوتها تفكرني بـالمصاغر
نتفكر ڨُاع جمـاعتي نتـاع أمضاري
17-منهم بوجلطية فحشوش يفاحي الحاير
و أحمد تارب فــارس ولــد دواري
18-خليفة ڨطاوي للخير يسعى و يبادر
ملاحي و بشير حميس حسـن خياري
19-شاعر المناسبات معمر ديما حاضر
الشاعـر محـبُوب عسل يْحَلـي مراري
20- محبتـي ليهم فـا لله تتكــاثــر
تفكرتهم الدمعة رابت من تحت شفاري
21-توحشت بـرورهم روحلهم زايـر
حكمتهم عشبة العليل يــولي بــاري
22- نعيمي رافڨني العرش سيد الناصر
شـوار جمــال جلالي نســر صحاري
23-أحمد مداح ڨلبي مــا لغشمة طاهـر
طايع للمشيخة فالمرجة تڨدي ناري
24-ونكبر على لي حاسب روحو غـازر
ويــن حـاط أنــا مـاني بِــه داري!!؟
25-النفخة ماهيش من خصايل الشاطر
النفخـة تخسر بين البايع و الشاري
26-طعامي الضيف ربــي دايمـا فـاير
مرحبا و سهلا قــاصــد بــاب داري
بقلم م/أحمد (قلم التل)
تعليقات
إرسال تعليق