حٓرّزٔ الشيوخ .... علي جدايني
::: حٓرّزٔ الشيوخ :::
ورڨات جابهم عرف الكاليتوس ...بخر غناه
سجرة كابرة ف جناني
حرثي ماروى م حليب العتروس...مااا تمناه
ما ونغ الهجا م الداني
علامي فالعلالي يرفع الرووس...زايد اعلاه
بين الشيوخ ذاك مكاني
السيف حين طاح ف يد المنكوس...ضيع غلاه
ميت جاب قاف هجاني
ماشي اللي جبى بالكلمة مسوس...زاد ف الجاه
ولا اللي رمى توشاني
ولا اللي اركب ودنى محبوس...شاف م كفاه
ولا من درس صفاني
وجميع من تعالى كيف الطاووس...سير تلڨاه
م كفاه سايڨو روحاني
راكع فالتراب وراسو مغروس... جايب خلاه
ويقول علمو نوراني
الشيخ علمو ف قليع الكرموس...راح ونساه
قال العلم جا وقراني
و اذا تعلمو يتيري ب الكابوس...عف ملقاه
غدوة ما تقول ارماني
دلاعة تباعت و طبعها موس ...مات مولاه
وبقى شاهدي عزاني
يا سابغ الشعر يا ولد الفلوس...ريحك سفاه
وانا دواك يا ذ الجاني
مرزوڨي سهامي تقلع لضروس...عرش بوطاه
جاهي جابلي سلطاني
طايع للشيوخ مشعل فانوس...مسك نهداه
سابڨ ريحتو ميزاني
عيبي لا يشوفو حباب ريوس...حر نلڨاه
نسبق ف السلام حصاني
وقدري لا يذوقو غاوي منجوس...لفت ملقاه
نسقيه واش راه سقاني
لو ما الفانية تمشي بالمعكوس....لا من ارجاه
مقيود مايقود معاني
واذا انت موالف لليد تبوس....رطب اشفاه
راها الفانية للفاني
لا ترميش وين يقروك دروس....قول عافاه
هاذاك شيخنا قراني
هذي وصايتي ليك انت مخصوص...حط واخطاه
ألعب راك بين عياني
تعليقات
إرسال تعليق