ما عندي غيرك .... بوالفلفل رابح

 هذه القصيدة بعنوان:(ما عندي غيرك)

ربي لا تحوجني لغيرك***ولا ترميني لباب خطيك

عبدك ولا جاحد لخيرك**ربي حاجتي م بين يديك

يا نفسي م هو يجيرك**م غير المولى شكون يحميك

الدنيا هاذي مسرح سيرك**العب الدور اللي ايواتيك

لا تفشي ما يخفي بيرك***كلشي راهو يرجع عليك

واستر يكون الله ستيرك**لو سمعت وشافو عينيك

وابسط الضيف الله حصيرك**الله من فضلو يغنيك

اعمل الخير  للغد  دخيرك***في يومها تلقاه ينجيك

بنفسك راح تعرف مصيرك**تحصد ما زرعت بيديك

قلبك راهو للبر  خبيرك***شاور الفايدة  اتولي  ليك

هاذي دنيا خير عشيرك**يصون العشرة وما ايخليك

كي تعقد اسال ضميرك***وكي تحصل فكها بسنيك

ولا تحقر بالعين نظيرك***العود اللي تحقرو يعميك

الطريق الصحيح من ينيرك***م كل ظلام داير بيك

اطلب م الله يصلح طيرك***ودير النية الله يهديك

اليوم اللي يروح  نذيرك***واللي جاي يتحلف فيك

وجد الزاد وجهز  عيرك****يوم الرحيل لابد يجيك

تفاءل خير يجي بشيرك**واحسن الظن فالله يعافيك

ع كل ابلا  هو  نصيرك***ومن كل اسقامك يشفيك

يا الحنان ما عندي غيرك** اهديني ربي لما يرضيك

الشاعر الشعبي: بوالفلفل رابح