كلام من ايام .... رابح ابوالفلفل

             ::: "كلام من ايام" ::::

ما تسل سيف ولا تركب جواد**ف ميـدان الحـرب حتى تكـون فارس

ولا تعـد العدة وتعلـن الجهــاد**تهــلك نفسـك بجـهــل وانـت م دارس

كون راجل حرب متمكن وجاد**وعلـم بلي الحـرب خـدعة ودسـايس

اشحــال م قايد ساق قومـه قاد**الحــرب دامية مثل غبـراء وداحـس

ولا تحمل قوص وانت م صياد**اتعلــم الرمــايـة لا تخجــل مــارس

م هو كل رامي ماهــر وســداد**كم م فاشــل ثـوب الفـرسـان لابس

وحين تدخل غابة وتدخـل بلاد**فـرّق بين لفـريســة وبين الشــارس

واعرف نوع لحديد م عند الحداد**الحرفة راهي فن ورزق وتوانس

واعرف الفلاح في وقت لحصاد**تعــرف حينها كم م ارض غارس

ولا تذكر لاحزان ف يوم لاعياد**اليـوم اللي مليـح ينسيـك فالعـابس

ولا تنظر للحياة بعين السـواد**اتفـاءل غيــر الخيـر ونفسـك سايس

كل يـوم جـديـد يتسمـا ميــلاد**اغنـم فيــه الفــرصـة م تبقى ناعـس

في نصرة الحق م لازم حيّـاد**لا تسكــت عــالحـق وتبقى طــالـس

حين تجي فرصة اظغط عالزناد**تتحقق لاهــداف مـن دون هاجس

لحياة امتحـان لا ماكلة ورقاد**خــدّم عقلك ملـيــح م تكــون حـابس

م تحكم بالعين على حد م لعباد**وثقل فالميزان في وســط لمجـالس

م تقول هذا رحيم وهدا جلاد**حتى تقــرا لافكـار م تحــت لكبـابس

اشحال من عين غلطت فالعواد**اللي حسبنــاه ليّــن صبنـاه يابـس

ولا تعاشر اللي يمشي بالحقاد**ولا تـأمــن اللــي فالاودن هــامـس

ليام من اتعري الخاين والقواد**وتكسي الشجعان من خير لملابس

لا تتعصب براي وتجادل بعناد**وافهم معنى لحديث وكونك سالس

ذوق من لبريق وذوق من البراد**اهل الذوق الراقي عليهم تتنافس

حتى وتكون بحـر تحتاج للـواد**العبـد فقير محتاج ويكــون رايس

وعد نعم الله م تكــون حسـاد**تاكلك نار لحسـد واتولي فابخـايس

واشكر الله لكريم النعم تزداد**واذكــر الله لعظيـم قـايم وجـالـس

م قال النعم غير مـال واولاد**نعــم الله كثيـرة والعـبــد م حاسس

رابح بن عمار لاشعاره نشاد**من بعــد الخمسين فالعـام السادس

هذا ما وهبني المولى الجـواد**ابيــات مــن اشعــار بهــم انقـايس

بقلم الشاعر بوالفلفل رابح من سكيكدة