خذ الحكمة .... رابح بوالفلفل
:::خذ الحكمة :::
مهما يطول الجرح يبرا
وكلام عار صوته داوي
اخلع من عمية وبصرة
وحكاه من عاقل وخاوي
مطعون في ضحكة وقصرة
فالقفا في حديث راوي
انيني من حريق جمرة
سمعوه قالو ديب عاوي
طيحت راجل عندهم شكرا
ترجع الكل مرخس حكاوي
لا تترك لعدوك ثغرة
يرمي سهمه قاتل قاوي
عاشر من النفوس الحرة
من كل ظريف ومعناوي
وما تنكر للرجال عشرة
واحذر من كثر الشكاوي
وم تنوي الشر عناد مكرا
تكثر عليك غير لعداوي
الظالم لا يغمض شفرة
متبوع من شر الدعاوي
لحجار فالماء ما تطرا
صنع من صلب وقساوي
شي عباد قلوبهم صخرة
ولا رحمة فيها تاوي
صون لسانك من العثرة
دير لجام الشيطان غاوي
كون ارزين اوزن الهدرة
لكلام في وقته يداوي
املا لفراغ خطرة خطرة
واش فاد قعادك لقهاوي
الشيشة في ليالي حمرة
الدوخة مع بخور وجاوي
خطوة خطوة تحلى السهرة
الكاس يدور مع لغناوي
لهلاك نفسك ترجع جرة
يا اللي غارق فالنشاوي
شوف م قبلك خذ عبرة
مشروع من سكاكن وهراوي
لا تعشق الفانية مرة
تعيا تشقى من الجراوي
ابني دار بحلال صغرى
خير من قلعة برشاوي
واكسب من لحياة خبرة
وانتج من مرها حلاوي
وازرع الخير لو ف صحرا
ينبت لو رملها كاوي
كول ف دارك بالماء تمرة
وكي تخرج بجميل كساوي
شي عباد تحكم بنظرة
م شافو بطنك واش حاوي
صمتك بين لجلوس سترة
الكل سفيه ع الشر ناوي
كلام لشياخ يبقى ذكرى
من بن مسايب للمغراوي
بن خلوف طيب الشجرة
ما ننسى التومي والبرناوي
من اهل الحكمة الشهرة
من مديح وغزل وهجاوي
رابح بوالفلفل من ادرى
يذكروه في بعض حجاوي
كل شاعر ىزرع البدرة
محصوله من مليح ومداوي
الصلاة على ابي الزهرا
بن عبد الله المكاوي
بقلم الشاعر بوالفلفل رابح
تعليقات
إرسال تعليق