اهل الملحون .... جمال جلالي
*** اهل الملحون ***
01 – بسمــك يـــا كريـم سهلــي فالقول
و فتحلي بيبان فضلك يا الله
02 – نحكي للسامعين في زماني و نجول
ما سمعت وذنـي و ملموس قريناه
03 – في وزان الملحون يا ما قالو قول
تمعنــا فالقول و فهمنــا معناه
04 – ذاك الوقـت الزين لحقنـا بالمنقول
اسقي يا عطشان من نبعو محلاه
05 – سيدي لخضـر جال في مدح الرسول
تـاج الانبيـاء ومن صلاو وراه
06 – غـزوة مزغــران خلدهـــــا بالطول
ويا فارس من ثم جندي كان معاه
07 – سمعنا بن كريو فاطمة ناض الهول
بنـت الزعنوني من عرشو ونفاه
08 – قمــر الليـل هواه مـن قلبـو معلول
الخاطـر متونـس يتمنى ملقاه
09 – شفنــا بـن قيطون راكب المخلول
يرثــي حيزية وسعيد مقواه
10 – ما طيحش تراب ع الزين المكدول
بنت احمد بالباي عشقو يا حصراه
11 – سمعنا ع الخالدي من بختة مهبول
الرقبة كي الطرنيش وصفو يا مبهاه
12 – جاية في كليش تتمخطر و تجول
اتغنات اوزان الخالدي في مغناه
13 – الشيـخ سماتـي تمنى الكـاف يزول
اتحـول يـا كــاف كـردادة لياه
14 – درقــــت غزالـــي عليــا زاد الهول
يـا شامـخ لوطاد من دونك ملقاه
15 – سمعنـا بـن سهلة يتمحن ويصول
يغازل فالمحبوب و غرامها مضاه
16 – بيــن هـدة وفراش بكلمو معدول
يومك يا الخميس نهارو واش داه
17 – يا اهـل الجـود الزرهونــي ويقول
وافقتو قدور قاصد في معناه
18 – يتوســـل بالله وصحــــاب القبول
يا سعدو بالسعد يا سعدو بضياه
19 – يـــــا عشـــاق الزين كي رانـــي مهبول
بـن تركي ينـده غرامـو مـا خباه
20 – مــــن قولــت لالا مبنـــي ع المجهول
طاب القلب وطاب متولـع بهواه
21 – محمـد بلخيـر يوصف الرسول
وثورة سيد الشيخ ذا فارس بشناه
22 – فــــي بلاد الكفـــــار دار عليــــه الحول
سلاك الممحون يناجي في مولاه
23 – الطاهـر بن منصور يستغفر ويقول
هــذ الدنيــا فانيـا بعدها بركاه
24 – و الحــــاج سليمــان يفقـــه فالمنزول
يرحمهــم لاثنيـن شيخــه و بباه
25 – لـــو عـــددت شيـوخ كــذا من فحول
يرحم مــن ماتـو و الحييـن سواه
26 – ونختـــــــم بالصــــلاة على ابو البتول
محمـد شفيعنـا كرمـو ربــــي وعطاه
نسر الصحراء 2022/03/06
تعليقات
إرسال تعليق