ملتقى الاصنام للادب الشعبي محبوب الشاعر ... علي جدايني
::: ملتقى الاصنام :::
- محبوب الشاعر
قلت نجي ونجيب في يدي وردة
تفتح كل زهور في جنان ابلادي
- علي جدايني
نهديلك منها عسل من الشهدة ....
دار الخير بناسها جبت زنادي
- محبوب الشاعر
عسل النحلة راه يشفي جميع الدا......
ونت يالصنام طبي وضمادي..
- علي جدايني
وانت فيها ك الڨمر ضي القعدة ....
محلاك ومغلاك بالحرف قصادي
- محبوب الشاعر
قمر الليل علي ضياكم زاد اقدا.......
وضوا كل مكان في حوض اسيادي
- علي جدايني
قعدة بين حروفكم نزهى لبدا .....
حرف الشيخ يزيد في بهو انشادي
- محبوب الشاعر
وحش صحابي راه طول ذي مدة.....
بين حروف الشعر ودرت ارقادي....
- علي جدايني
واحنا فيك نقارعو جيب العدة.....
وارواح شواري نبرد غدادي
- محبوب الشاعر
في الموعد تلقاه شعري كي نبدا.......
وتصنعلي موال في حفل نشادي
- علي جدايني
نحطك بين رموش عيني والكبدا ...
ونغذيك خيار ماجاب جوادي
- محبوب الشاعر
نمشي وين يقول قلبي وين غدا.......
قلبي والملحون والطير اينادي
ساعفني واحمل عني ذي النكدة........
ويلا زدت اغلطت حاكمني عادي
- علي جدايني
راك مسامح يا حبيبي ف الهدة.....
اطلق حرفك بيه نجمل حصادي
- محبوب الشاعر
جبت الشعر امطار ع الورقة ندا.........
به نزيد اخبار حبر ومدادي
قلت انجي ونجيب في يدي وردة.......
ونغرس ورد الحب في جنب الوادي
- علي جدايني
يا مرحا يا شيخنا اليوم وغدا.....
البركة ف حضوركم راح انكادي
انت كلك ورد ريحك يا عمدا.....
يلحق قبلك للمراسم و ينادي
- محبوب الشاعر
قاصد باب الدار عندك نتغدا.......
جينا ليك اضياف بيا باولادي
- علي جدايني
أهلا وسهلا بيك يا زين الهدة.....
بالعلفة نهداك سرجي و عوادي
- محبوب الشاعر
تلقاني لصحاب في يوم الشدة......
كرمة للمضيوم من خبز. وزادي
سلاك المغبون في وقت الشدة.....
مول الخير صحيح صافي بجدادي
- علي جدايني
عاشرنا رقبة وقمنة والزندة .....
وشفنا وقت همومنا حر يصادي
كرمونا رجال وكفينا وجدا......
وباقي حاضي خيرهم في تنهادي
- محبوب الشاعر
الرجلة والنيف في اصلك تبدا.....
في فرحك مبروك يا زهو عيادي
- علي جدايني
ياشيخي راهو مقامك فالكبدة......
ربي عالم واش يحمل فؤادي
- محبوب الشاعر
هدرة حق عليك بحروف البردة....
ولسانك بارود رشاش ايصادي
اجمع هذا الشعر غير وحدة وحدة.......
واكتب اسمي زيد واخفي تردادي
- علي جدايني
ولسانك راوي رحيق ونار ڨدا.....
شيخ وزانك ما توخر للرادي
بقلم #محبوب_الشاعر
و #علي_جدايني
تعليقات
إرسال تعليق