عيد الحرة .... علي جدايني
::: عيد الحرة :::
❣️❣️❣️
جابتني ذ القافية في مرا حرة
بنت دزاير كي الشمس فكل صباح
كانت لبة حارة وقت الثورة
وكانت تقرص كالرزوزي في لجباح
وردة بيضة شوكها خلى دبرة
في جنود فرانسا غرست لرماح
محڨورة ما تفك لوحة ما تقرا
روات الأرض بدمها بنت الصلاح
تحت جناح هلالها نجمة حمرة
ضوات ف لستقلال ثمرة الكفاح
بعد المر ضحات ذ الحرة حرة
وولدت خير رجال علامة صلاح
وعاشت لستقلال ذ الڨمرة ڨمرة
باهي نور حنانها دافي وضاح
وبعد الضحكة جاتها نار الجمرة
قدات وزاد لهيبها فالقلب رياح
بكات دموع على صغير المجزرة
و معلمة كي نذبحت شاو صباح
وعلى بنت سباوها كانت تقرا
والعسكري اللي تغدر م الجياح
ما خلات بلادها ف وقت النعرة
والعود اللي ماكسرها دار جناح
شمس دزاير بيك تضوا يا عدرة
رمز القوة فيك نار الحرب سلاح
انتي لميمة وفي حضنك نبرا
وانتي الأخت اللي توريلي لملاح
انتي الزوجة فيك حبي والعشرة
وانتي طبيبة اللي داويلي لجراح
ورد بلادي زين باهي ف النظرة
ثمنية مارس عيدكم جايب لفراح
ورد حروفي جاب مسك لكل مرا
ممزوج بعطر المحبة جا فواح
بقلم ،#المرزوڨي
تعليقات
إرسال تعليق