نار شواقي .... علي جدايني
بقلم المرزوڨي
::::::::::::: نار شواقي ::::::::
واش داني لبعيد في سما عيني شفت قصيد
ضاوي كهلال العيد فيه عيني لسقت محتوم
اسكني فالتنهاد كيف عودة في يوم طراد
فارسها جا صياد فشلاتو حجلة مرڨوم
نجم الثرية ذاك في سمايا جاني بهلاك
قتلو يا زين بهاك ساقني لدهاليز الرووم
وانايا كي لعديم شم ريحة في وقت الضيم
سلم ليها تسليم ماقدر يسمح فيها يوم
ريحك ريم الغزلان مسك فيه رحيق البستان
وسط حرار وڨومان نيف شان وهمة وعموم
مايكفي وصف الذات غير خالقنا ياسادات
جمل فيها صيفات ماتلاڨيها في ذ القوم
نور وجهها وضاح فيه قاضينا تاه وراح
فيه الطب ولجراح فيه يبرا من هو مهموم
كحل السالف نهواه رجني قهوي زاد معاه
في خصلاتو واتاه زادني في لحني منضوم
من ذوبني في كاس عطر بريحو بلعباس
سكنتو في لنفاس راه وسط الكبدة مقيوم
حياني بعد فنيت من شواك الورد توضيت
شابع منها وريوت في وقاري نحسب ونصوم
رجعني عشر سنين زيدها عشرة مالخمسين
واقسم عشرة رفين سن عزي جبتو معلوم
كان الزهو ولفراح والقصيدة فيد البراح
وانا عندي مفتاح باب حراز اقهر الڨوم
ناري م لبعد تصيب في ذراعي سبح لحبيب
واتسقيت من الطيب سكرو عنقود الحلقوم
يا حصرا يا ليام واش ذوڨتينا م يدام
وسقيتنا لغرام ما تركتي قلبي مغموم
واليوم هجيت صوار حس فيها قلبي دمار
غطى راسي صبار ماتركني فالبحر نعوم
فناني بعد العيش في سوالف مرڨوم الريش
حاصرني كيف الجيش ليه سلمت انا مرغوم
لا ندخل هذ الهول لا نعيش فعينك مهبول
خليني كالمسطول بعد مدة نفطن ونقوم
من بعدك يا عفيف راح نعمى ونعود كفيف
نكوي قلبي بالسيف فيه زينك يبقى مردوم
لا نقربش المطروز لانشوف لعينك ونجوز
خلي قلبي محجوز للقوافي سارح ويهوم
هذا درس قريناه بير مر شربنا من ماه
من يدخلو يلقاه غي جراح ودمعة وسموم
اقفلنا هذ الواد في سلام شيوخي لجواد
سلمنا فالميعاد من سبقنا حرفو متموم
وختمناها رحمة على حبيبي نور الأمة
ذكر يفاجي غمة على شفيعي في ذاك اليوم
تعليقات
إرسال تعليق