شمس العارفين ::::: علي جدايني
بقلم المرزوڨي
قصيدة بعنوان : شمس العارفين
طلي يا شمس العارفين جهل غزانا زار البلاد
حرب مجهز للصالحين تقتل من غير سلاح
وطغات نفوس الطامعين ولات تفنن ف الفساد
وعلات علام التافهين شعلت ليهم مصباح
دخلت لصفوف الراكعين كالعودة في يوم الطراد
تلفت ڨبلة متوالفين بيها يقضيو صلاح
زادت في ليسرها يمين وعماتلها زين الثماد
باقي فيها متشاورين ثم عصفت لرياح
شلا مالقوم مسلمين والباقي ما عندو زناد
قفلو سبحة متغافلين سكنو عند البراح
جهرو لعداوة كاملين بيها دڨو شلا وتاد
ف السر يباتو ساهرين يحسبو فالتبراح
تحتك يا صور القاريين نصبو جن يجيب الرقاد
لعبو بحروف اللولين كسرو فيها لسباح
بالقطرة في وسط الجبين يحسبو ضربة للبعاد
تلقى لجيال مودرين فالعقلية جيااح
الغلطة ماهي فالوزين ولا في شيخ قرا وزاد
السم اتشرب في سحين بالوقت قوا وصحاح
حلفو بالطول مأكدين مايبقاشي فيها سياد
يهملو منها حارڨين مايرفدهمش مراح
دخلو بين المتزوجين ولات الطلقة بالعناد
هذا ذلي هذاك شين هذا قالو مشحاح
سبة عمت والخاسرين لحمة قاسوها مالكباد
نحلة ترعى في واد شين منفورة في لجباح
لا تستنى منها بنين لا تسقيها مر النكاد
راهي مشتاقة للحنين خلاها شاو صباح
ماباقي حرم الوالدين ولا أهل ولمة عماد
ولا عطف على السايلين تجبر بيهم لقراح
ف اللبسة راهم بادعين شير وشيرة صبحو نداد
يجرو فيها متسابقين لو صاب يدير جناح
لا خدمة لا مصروف زين رجعو بعد الشعلة رماد
من هو مسنود غدا فحين بين الشرفة نصاح
ومن لا عندو لكتاف شين لوكانو عالم فالرصاد
ولا قاري حرفو متين محسوب مع لقحاح
يبقى للحيط رفيق زين زادولو في حيطو ڨراد
يحسب لعباد الطالعين وشكون اهبط وتلاح
قوات الزطلة ومقفلين بالكاشي نعلوها بلاد
بالسرقة طاحو فالخشين مايرحمش اللي طاح
جاوك عديا متربصين يا وطني ما تركوش واد
ضربونا بالمدرة سنين لارحمة لا ترياح
وحنا مازلنا واقفين فرسان تلاڨي فالشداد
بين حدودك متخندقين ما يغوينا نباح
من ضن احنايا خايفين قلو لاقينا بالعتاد
فينا لقلوب مسلحين نخوة فالحرب صحاح
هذي عبرة يا سامعين حاضي وحفظ ورث الجداد
رانا فالدين مبعدين لاعزة دون سلاح
أرض الشرفة والصالحين مسنون السيف بلا غماد
تبقى في حلق الكايدين عظمة تفتح لجراح
في عام الغين وزيد غين كاف و با جبناها سناد
و الها في شهر الحاسبين با زاد نهار سماح
مختومة بصلاة الحنين سيدي يشفع فينا لغاد
محمد تاج المرسلين ليه الأمة ترتاح
تعليقات
إرسال تعليق