يا سايل :::::: جمال جلالي
كتبت في حال الشعر و الشعراء بمناسبة عيد الفنان بعنوان
""""""""""""""""" يا سايل """"""""""""""""""
"""""""""""""""""""""""""""""""""""""""""""""""
01 _ يـا سايل ... حالنا ماهو كي حال
حــال اللي حــال متخبــــل حالو
02 _ حــال الشاعــر راه خـارج المجال
لامــن ســال عليــــه زايد هوالو
03 _ واش نڨول عليـه نوفي ذ المقال
غيــر اللي ڨالــــوه عـــــدّد اقوالو
04 _ غطـــي ذاك البير واكتملي لحوال
لا تســول ســؤال ياســر من سالو
05 _ حتى حال الڨول ڨالو فيه اقوال
كــل زمــان يفــــوت عنــدو رجالو
06 _ تبعنــا ذ الخيط زاد الخيط خبال
سَلَكْنـــــــا ليميـــــن تخبــــل شمالو
07 _ كايــن مــن ڨال مــا تهدت جبال
وما نشفت وديان سواقيها سالو
08 _ و كاين من ڨال راه يشف الحال
حالو ماهو حال غايضني حالو
09 _ و انيــا ظنيـت نظـم الشعر هبال
و الشاعــر اذا ڨــال هامل بخيالو
10 _ هـــذ الكلمـــة نڨولهــا لابد تتڨال
والڨول بلا تفسير مفهومو والو
11 _ بكري زين الناس مذكور بالافعال
وبكري سِيــد الناس سَيّــدْ بخصالو
12 _ بكري شين الناس مايجالس عُقال
وبكــري شين النـــاس لا مــن يصغالو
13 _ العيـن ع الحاحب ما تعلا محال
البَنْيِّ بــلا ســاس حيطانــو مالو
14 _ الخاطـــر يميــل للڨلـــب اذا مال
و اذا مــال الڨلـــب لا حـــد يسالو
15 _ اهل الشعر يهمهم شكون لي ڨال
وصاحــب المقـــال يوفــي مقالو
16 _ ماهــــو طالب عز ولا طالب مال
ولا طالــب جـــاه باقــي في حالو
17 _ ماهـــو شاعــــر ولا راهـــو ڨوال
حُبـــو للملحــــون ساكــن دخالو
18 _ يــــا شعــراء هديتكم هذا الموال
وسـال على مــن سال مرحب بسوالو
19 – ذا عيــد الفنــان كــان علينا فال
الثامــن جـــوان مــا شفنـــا والو
20 – الفين و عشرين زيــد ثنين قْبال
مــن بعــد العشريـن تميت تسجالو
21 _ من جاب المنظوم ذا خوكم جمال
النكـــوة جلالي عـــن عرشــو سالو
22 _ لنواصر ينسب شرڨي جبل كسال
مرحــب يا مـــن جيت زايــر توالو
23 _ و نختم بالصلاة على بدر الكمال
مـــن عــزو ربــي كرمــو و عطالو
24 _ صلاة الحبيــب تشفــي كل علال
صلــــى الله عليــــه شاتـــي نغدالو
نسر الصحراء 2022/06/08
تعليقات
إرسال تعليق