ما بقات بنة ::: محمد نعيمي
ما بقات بنة
تلفنا الدين و بالدنيا نغرمنا ... مابقات بنة
ما باقي . كي ڨبيل شد كتاب
تركنا الفرض وجهلنا السنا ... مابقات بنة
مدحنا الحاضر . هجينا من غاب
سبقنا الضالم بالضلم تهمنا ... مابقات بنة
كذب الصادق . صح ڨول الكذاب
بين القبيح . والمليح وهمنا ... مابقات بنة
حليب المحنا هك ضنيتو راب
ساط الريح وبغبارو ردمنا ... مابقات بنة
بين البينين وش جاب لجاب
بين الرايح . والجاي هملنا ... مابقات بنة
الجايح للعلا طلع . الساجي راب
الشكوى لرب وللعبد نحتمنا ... مابقات بنة
الساهل في وقتنا . هاك صعاب
ذاق الخاطر الڨلب ما تمنا ... مابقات بنة
سبابها السعد . في العد حساب
بلا شقا من التعب تعبنا ... مابقات بنة
عمر الهنا تباع ولا ينصاب
لكان الصبر دوا منو شربنا ... مابقات بنة
زاد صبرنا . للصبر غير عذاب
صغار ومن الهم شبنا ... مابقات بنة
عيا الڨلب على الجمر طاب
مزينها ليام يامس كي كنا ... مابقات بنة
وجه الحيا اليوم لونو شهاب
غابو الحروف ونشف قلمنا ... مابقات بنة
لا لسان طرب . لا ڨلب رطاب .
محمد نعيمي
تعليقات
إرسال تعليق