الفضل لربي ::: نائل عبد الحميد

 الفضل لربي

ساعة ومن يعطيه ربي ويفتح عليه

يتـــغول ويڤــول عطاني ذراعي

يجهـل ويتــكبر علا ناسو واماليه

ومايوصل رحمو ولا لدمو يراعي

ويحسب ڤع الناس طامعة فـــيه

ودايرهم بشـر فـثـوب لفاعي

هاك عقـلو مودرو راهو عامــيه

ومايـــديرالخــير ولا ليه ساعـي

وساعة ومن يعــطيه ربـي ويسجـيه

مولى ندهة ويــعرف الدنيا واعـي

ايمـــــد ما يخـاف الفـــقر يجـيه

ومايرد اللي قصـــــدو ولا كاعي

وجــــه الرضا ديــــما يڤابل بـيه

وكلامو زين للڤلوب طواعي

وفالدنيا الزين والشـــين تلاڤــيه

وسعد اللي للخير داعــــــي

ودير الزينة واللي ربي ترضيه

وعيش حياتك في حلالها متاعي

واياك عمرك في اللهو اتفنيه

الموت غدارة والقاشي فيك ناعي

وماتدي غير كفن جسـدك يغـطيه

وماينفعك مال ولاولدك فيك شفاعي