بنتي دلوعة ::: ندى الشعر

 بنتي دلوعة

يا سايل عن حالتـي نا مڨـواني

 همي زاد معاه ذا الجيل المكشوف

حال بنـات اليوم زايـد لمحاني

ترڨد نص نهار لا حشمة لا خوف

بوها ليه شروط فاقت لوزاني

عشرين المليون محسوبين ردوف

لخواتيم بزوج بالجوهر ثـاني

و ذهب مخير جايبو آخر كاشوف

خيط الروح يكون صنع بريطاني

هاذي هي شروطها وتزيد تشوف

بنتي زينة زيـنها نعت ألمـاني

ماتفتل طعام ماهي تاع ضيوف

تبغي طياب الريسطو بالألواني

والشهرية شاك صاحبها ملهـوف

ڨرب ولا روّح ماكش وحداني

بنتي بدر النص بحسابو معروف

ماهي صنف فريد كيف النسواني

والخطابة دايرة فالباب صفوف

ندى الشعر