رباعيات اسمع مني ... جمال جلالي

 ༺༻اسمع مني ༺༻

01 _ كبير الجماعة بقدرو لا تعاديه 

༺༻ جالسو و خوذ منو الحكمة 

02 _ و الدوني دوني بعدو لا تساميه ༺༻ لا تسرو لا تعطيه كلمة 

03 _ الجار الزين اصحبو لا تجافيه 

༺༻ تغيب و يكون ليك حرمة

04 _ راي الجايح ما ديرش عليه 

༺༻سوقو راشي ما يجيب سومة

༺༻و اسمع مني༺༻

05 _ و القليل كرمو بالموجود لا تحافيه

༺༻بفضل الله تزيد همة 

06 _ اليتيم كفلو زيد واسيه  

༺༻ تجاور النبي بو فطيمة 

07 _ الكريم ع الجود لا توصيه 

 ༺༻ عادة بوه وليد خيمة 

08 _ البخيل الكرم ياك خاطيه 

༺༻ ما يمدش يا لوكان لقمة 

༺༻ و اسمع مني༺༻

09 _ من حبك ف الله لا تخليه ༺༻ يوم الشدة تلقاه ثمة 

10 _ و من كرهك لا توسل عليه 

 ༺༻ ما حفر قبر ما محا البسمة

11 _ طيع ربي و التقوى زاد تديه

༺༻ و الوالدين باب لكل نعمة 

12 _ خوك خوك بالشينة لا تلاقيه

༺༻ يرحل و تعشي في ندامة 

༺༻ و اسمع مني ༺༻

13 – لسانك على قول الحق ربيه

 ༺༻ ياك يقولوا ما فيه عظمة 

14 – شاهد الزور ما تحوس عليه 

༺༻ ما تجالسو ما تعطيه قيمة 

15 – ما تضحك على لي ربي بليه 

༺༻ يعفو و تنزل من عندو الرحمة 

16 – الرحمان الرحيم لا رحمان غيريه

༺༻ باب التوبة مفتوح ديما 

༺༻ و اسمع مني ༺༻

17 _ جمال من جاب القول سميه

༺༻ ناصري حر جلالي النقمة 

18 _ مسلم لشيوخو  جده و ابيه

༺༻ و الحاج سليمان الف رحمة 

19 _ مصلي ع الرسول طه و أليه 

༺༻ من طفات بنورو كل ظلمة 

20 _ مفتاح الجنة ع الحوض لاقيه 

༺༻ بالصلاة عليه توفى الختمة

 

2022/12/28