السماح .... جمال جلالي
♕♕♕♕ سماح ♕♕♕♕
سماح نڨولها من ڨلبي سماح
– سماح نڨولها من ڨلبي
♕♕ يا من سطرت خطوط دربي
♕♕ ناديتك ... وينــك يــا حبي
لا تجافي و ارواح ♕♕ سماح
– يا سالب روحي ولُبي
♕♕ يــا بلســم لجرحــي وطبي
♕♕ مــا درتــك سر حتى نخبي
نقشت حروفك في للواح ♕♕ سماح
– يا هاجر ارضي وسمايا
♕♕ و منشـــــف دمـــوع البكايا
♕♕ هجرانك ... زايد في شقايا
نتلاطم بين لمواج لواح ♕♕ سماح
– يا ڨادي فيا نار لشواق
♕♕ مـــا نحمــل طــول لفــراق
♕♕ هامــــــل بيـــــن لســــواق
ونادي يا مداوي لجرااااااح ♕♕ سماح
– يا عيني وعلاه تبكي
♕♕ مـا لڨيتـي لشكــون تشكي
♕♕ بركانــي مــن بكــاك بركي
ما تزيدي لڨلبي لقراح ♕♕ سماح
– ماني طول الليل نُرڨد
♕♕ في دواخلي نيران تصهد
♕♕ بسلاسل حبك راني مقيد
غابت من وجهي لفراح ♕♕ سماح
– غيبت ... وغيابك طال
♕♕ ستنيت وستنيت شحال
♕♕ اكتبتك ... حروف موال
وتهت بين لبرور نواااااح ♕♕ سماح
– تمنيتك في يوم ترجع
♕♕ وهمومي من البال تُضع
♕♕ ما تخلي لعلال توجع
نهنى من بالي ونرتاح ♕♕ سماح
– يا هوسي فيك نرجى
♕♕ دللتــك وزدت درجة
♕♕ لا تخلي ليام عوجة
خايف ما يطلع صباح ♕♕ سماح
– ترجيتك ومبان خبرك
♕♕ كاوينــي بغــرام حبك
♕♕ لشيوخي راني شكيتك
ونادي وينكم يا صُلاح ♕♕ سماح
– المبلي بيك واش يدير
♕♕ نهـار تغيـب راه يحير
♕♕ مـا طول عليــه كثيـر
يصدح ... بموالو برااااااح ♕♕ سماح
– مقصودي ما هو بنية
♕♕ تهواسي لي هام بيا
♕♕ ناسيني ما حاس بيا
هايم يا الڨُمري في لسطاح ♕♕ سماح
– هاجرني شيطان شعري
♕♕ ماني ظالم ياك عمري
♕♕ ما نسلم حتى لقبري
ماني طالب غير السماح
– سماح نقولها من ڨلبي
♕♕ يا من سطرت خطوط دربي
♕♕ يا لي زايد في عذابي
ما طولشي و ارواح ♕♕ سماح سماح سماح
♕♕♕♕♕♕♕♕♕♕♕♕♕♕♕
تعليقات
إرسال تعليق