لمحبة و العز ... العامرية

 لمحبة والعز في ڨلبي هسسو

هزلت كل محاسني كي شاب الراس

أحبابي و ظنيت عني ما يڨسو

ولا ظنيت رفاف يملا فيض الكاس

مكنوني وجواجي فيهم ڨرسو

وخدعني لمان ما ڨمتش عساس

حسرااا يا ليام ليلاتك مسسو

ڨلب رهيف وعايف الدنيا والناس

مكروا ما خلاوش الضوء يعسو

لاخللاو نجوم رفڨة للتوناس

نبكي بكي مرار ما طڨت ندسو

لا طڨت انداريه ونلعبها لباس

ايه نعاند ايه و دموعي رخسو

لانرضاش نحط حنكي للتعفاس

طعت جنوني فيه وعظايا لبسو

ثوب ڨصيف وعابني من دون قياس

عجبني بهو الواد وهواه و حسو

عجبتني لرسام لا من فيها داس

وحدي كنت نڨول زهري و ندسو

وحدي كنت نخاف عنو من لهواس

وحدو كان هبال ڨلبي و حبوسو

وحدو كان العين في عيني تراس

وحدو كان اخضار عودي و يبوسو

وكان علام على علامي فوڨ الراس..

درتي ياااا دنيا و بانت عكوسو

هاهو الذهب فسخ وهاني عدت نحاس

سري هااااني بيه وكشفت طموسو

والشكوى لله يا خالق لنفاس..

...🌷العامرية🌷...