حب بلادي ... عبد الحفيظ كسالي

جف الخاطر والعقل ماهو هاني 

ونار الكية لاهبة تڨدي مشعال 

من يقرا لحروف يفهم لمعاني 

حبك وطني ورد شعشع مايذبال 

بسطار الكلمات من لفظ الساني 

و بإذن المولى تتسڨم لحوال 

حس الكية لاهبة في شرياني 

تبقى شامخ ديمن نجمة وهلال 

جارو عني هموم منهم بركاني 

مانسمح في عزتك وطني موحال 

تخفاف الذنوب بإذن الرحماني 

وجميع لي صاعبة عني تسهال 

عن وطني جدي يأكد و صاني 

نفيديه بروحي ودم و بالمال

راها سكنت عزتك وسط كناني 

ونسانا ظحاو عنك و الرجال 

فتش فاالتاريخ ماضي رباني 

للجهاد تحزمو ڨداش بطال 

دارو اليد في اليد ضد النصراني 

وخلوه  تاريخ  تقراه الأجيال 

أمر مسطر حكم بيد الفوڨاني 

متڨسم بالصبر فالحرب ولهوال 

ما فنا هم دهر لا حب الفاني 

زوعامة  ذوك تتضارب لمثال 

سبحانه داري السر الرباني 

عالم بلي ظاهرة ولي مازال 

تحفظ وطني من حقاد الطغياني 

عليه شفايا على كامل لرذال 

وتعم الفرحة شيوخ و شباني 

فالجنوب وشرق وغرب وشمال 

تمعن في الحروف تلڤا عنواني 

وسال كل ناظم عنها ما ڤال 

ذا عبد الحفيظ لسم الحقاني 

وكسالي لقبي نديره ديمافال 

ألف الصلاة على طاهى المداني 

محمد شافيعنا خاتم لرسال