المشكل مشكل رجال .... محمد مخنن
.. المشكل مشكل رجال..
المشكل، مشكل نتاع الرجال
ورجال وطني مسجلين غياب....
بومدين هو صاحب هذا لقوال
وكلامو مسجل في الخــطاب....
لبـلاد ماشـــــية نحو الإهمال
ضايعين في طريق كل ضباب....
ڨالولنا أصبرو وصـبرنا طال
وعمرنا فات تمرمــيد وعذاب....
الڨلب تعـــب ماعادش سواال
شبع،كره،ڤهـم، خلاااص طاب....
وشحال يزيد يصبر باش ينال
الراس فشل والشعر كل شاب....
الحڨرة بزاااف دايرة ضــلال
والڨليل ضعيف مجهودو غلاب....
عايشيـن أوهـام فاقــدين أمال
النــاس تبني وحنا بالـتريـــاب....
طلـبنا لهنا ما طـلبنا محـال
وطلبنا حقنا مناش بني طلاب.....
متمنــيين نعيشو راحة البال
نقصـدو ربي يتفتحوا لبواب.....
حُلمنا بسيط مايتطلبش جدال
حبينا نعيشو عيشة الشـباب
ماطلـبنا قصور ماطـلبنا مال
ماطلبنا نكونو رؤســاء أحزاب.....
.... محمد مخنن....
تعليقات
إرسال تعليق